GUSTONG AMYENDAHAN NG ADMINISTRASYONG DUTERTE ANG DALAWANG DEKADA NANG BATAS NA AGRICULTURAL TARRIFICATION ACT OF 1996.

MAGBIBIGAY-DAAN ANG AMYENDA SA PAGTATANGGAL NG LIMITASYON (QUANTITATIVE RESTRICTIONS O QR) SA DAMI NG PINAHIHINTULUTANG INAANGKAT NA BIGAS KADA TAON.

ANG QR – NA SYANG PUMIPIGIL SA PAGPASOK NG MURANG BIGAS MULA SA ABROAD PARA PROTEKTAHAN ANG MGA LOKAL NA MAGSASAKA MULA SA KOMPETISYON NG MGA BANYAGA – AY ISANG KASUNDUANG PANGKALAKALAN NA NILAGDAAN NG PILIPINAS SIMULA NANG MAGING KASAPI NG WORLD TRADE ORGANIZATION NOONG 1995.

SA ORAS NA MAALIS ANG LIMITASYON, SINUMANG INDIBIDWAL O NEGOSYANTE AY MAAARING MAG-ANGKAT NG ANI MULA SA MGA BANSA SA TIMOG SILANGANG ASYA GAYA NG VIETNAM AT THAILAND NGUNIT KAILANGANG MAGBAYAD NG 35% BUWIS. ANG MAKOKOLEKTANG BUWIS AY GAGAMITIN PARA PONDOHAN ANG MALAWAKANG PATUBIG, BODEGA AT PANANALIKSIK NA MAY KAUGNAYAN SA PALAY.

ILANG BESES NANG PINAYAGAN NG WTO ANG PILIPINAS NA PALAWIGIN ANG PAGPAPATUPAD NG QR PARA IHANDA ANG MGA LOKAL NA MAGSASAKA SA KOMPETISYON, NGUNIT PINILI NG GOBYERNONG DUTERTE NA HUWAG NANG MAG-RENEW NG WAIVER NANG MAWALAN ITO NG BISA NOONG HUNYO NG ISANG TAON.